Жорий йилнинг 1 сентябридан 18 ёшгача бўлганлар учун ягона болалар нафақаси жорий этилди. Фуқароларимизнинг бу борадаги саволларига аниқлик киритиш мақсадида пенсия жамғармаси вилоят бўлими мутахассиси Элдорбек Пўлатов билан суҳбатлашдик.

– Аввало, тизимда амалга оширилган ўзгаришлар ҳақида тўхталсангиз.

– Мамлакатимизда аҳолига кўрсатилаётган ижтимоий хизматлар ва ёрдамнинг манзиллилигини янада ошириш бў-йича изчил чора-тадбирлар амалга оширилмоқда. Бу борада "Ижтимоий ҳимоя ягона реестри" ахборот тизими яратилди.

Президент Фармонига асосан амалдаги 14 ёшгача болалар учун нафақа ва 2 ёшгача болани парвариш қилиш нафақаси ўрнига ягона болалар нафақаси жорий этилди. Ёши 18 ёшга, муддати 12 ойгача узайтирилди. Унга кўра, оиладаги болалар сонидан келиб чиқиб нафақа белгиланади. Яъни бугунги кунда 3 ёшдан 18 ёшгача бўлган битта фарзанди учун250 минг, 3 ёшгача бўлганбитта кичик фарзанди учун 325 минг, иккинчи фарзанди учун қўшимча 150 минг, учинчи ва ундан кейинги ҳар бир фарзанди учун 100 минг сўмдан қўшимча тўланмоқда.

– Айрим маҳалла фуқаролар йиғинлари томонидан "Нафақа бериш ёки бермаслик бизни қўлимизда эмас", "Сизга пул берилмайди", деган мазмундагижавоблар бўлаётган экан. Бунга улар нечоғли ҳақли.

- Аввалги таомилга кўра, ариза берган фуқаронинг ҳужжатлари маҳалла фуқаролар йиғинларининг ваколатли комиссияси томонидан кўриб чиқилиб хулоса берилар эди. Энди улар эътирозларсиз ҳар бирининг ҳужжатини (ҳуқуқ-тартибот органлари ходимлари бундан мустасно) қабул қилиши шарт. Яъни восита вазифасини бажаришади холос. Шунинг учун "Сизга пул берилмайди", дея қатъий рад жавобини беришга ҳаққи йўқ. Эҳтиёжмандлик инсон омилисиз,дастур орқали аниқланади.

– Қандай ҳолатларда ариза қаноатлантирилмайди?

– Бир ой мобайнида вилоятимиз миқёсида 55 мингдан зиёд мурожаатлар келиб тушган. Уларнинг 30 фоизи ижобий ҳал этилган. Аҳоли шуни яхши тушуниб олишларини сўрайман: нафақа тайинланиши мен ёки маҳалла фуқаролар йиғинларининг қўлида эмас.

Ўрганишлар жараёнида 5 хил ҳолатда "Ижтимоий ҳимоя ягона реестри" томонидан рад жавоби бериляпти. Яъни:

– доимий яшаш жойидан рўйхатдан ўтмаган фуқаролар. Булар асосан чегара ҳудудларидан ёки қўшни давлатлардан келин бўлиб тушганлар;

– оила номида автомобиль бор бўлса;

– иккита ёки ундан кўп кўчмас мулкка эга фуқаролар;

– даромад миқдорини белгилашда мезондан (393 минг) дан ортиқ кирим қилаётганлар;

– ишсизлар.

– Амалиётда автомобили бор ёки ҳеч қаерда ишламаётганлар ҳам болалар пулини оляпти-ку.

– Агар машинанинг ишлаб чиқарилган санаси етти йилдан кўп бўлса пул тайинланади. Ишсизлар масаласига тўхталадиган бўлсак, Юртбошимизнинг фармонига кўра, 67 турдаги фаолият билан шуғулланаётганлар йиллик солиқ ставкасини тўлаб ўзини-ўзи банд қилиш имконияти яратилди. Айни кунларда бу 270 минг сўмни ташкил этяпти.

Маълумот учун: оила аъзоларининг шахсини тасдиқловчи ҳужжати, фар-зандларнинг туғилганлик ҳақидаги ҳамданикоҳни қайд этувчи гувоҳномаси нусхалари тақдим этилади.

Ҳувайдо ХЎЖАМҚУЛОВА

суҳбатлашди.