Ҳаво анча салқинлашди, эрталаб, кечқурун совуқ кучини кўрсата бошлади. Ҳаво ҳарорати ўзгариши билан бир зумда грипп деган хасталик авж олиши табиий. Кўпчилик аллақачон гриппга қарши вакцина олишни бошлади.

Хўш, унинг самарадорлиги қай даражада?

Гриппга қарши вакциналарнинг самарадорлиги 90 фоизни ташкил этади. Бу ҳақида Санитария-эпидемиологик осойишталик ва жамоат саломатлиги қўмитаси бўлим бошлиғи Дилором Турсунова маълум қилган.

Таъкидлаш керак, грипп оёқда туриб ўтказадиган касаллик эмас. Уни оддий шамоллаш деб бўлмайди. Ўзбошимчалик билан даволаш ҳам мумкин эмас. Чунки хасталикнинг асорати кўпроқ хавфли.

Грипп вируси қон томирлари деворларининг касалликка нисбатан ҳимоя қобиғини сусайтириб юборади. Шунинг учун инфекциялар қон оқии орқали ички органларга етиб бориб, яллиғланиш ўчоқларини ҳосил қилади.

Натижада у пневмония, бронхит, юқори нафас йўлларининг иккиламчи бактериал инфекциялари, асаб, юрак-қон томир тизими касалликлари ҳамда қандли диабет каби хасталикларни келтириб чиқаради. Энг ёмони, ушбу дарддан ўз вақтида даволанмаслик ўлим ҳолатларига ҳам олиб келиш эҳтимоли бор.

Мана айни пайтда барча ёшдагиинсонлар, айниқса, болалар ва ўсмирлар орасида грипп вируси авж оляпти. Кўтарилиш даври одатда ноябрдан бошланиб, март ойига қадар давом этади.

Ишончлик ҳимояланиш учун энг самарали ва тўғри йўл – унга қарши эмланишдир. Қолаверса, вакцина хавфсиз ва юқори таъсирга эга. У йиллик касалланиш ва ўлим ҳолатларини етарлича камайтиради. Яъни гриппга қарши замонавий эмлаш воситаларининг самарадорлиги 90 фоизни ташкил этади.

Мавсумий гриппга қарши вакцина организмда 15 кун ичида гриппга қарши иммунитет ишлаб чиқади. Таъсир кучи 1 йилга етади.

Эмлашдан олдин шифокор томонидан эмланувчининг саломатлиги албатта кўрикдан ўтказилиши шарт. Эмланадиган шахсда шамоллаш, нафас олиш йўллари яллиғланиши каби касалликлар сезилса, бу пайтда вакцина қилинмайди. Шунингдек, вакцина таркибидаги компонентларга нисбатан аллергик таъсирчанлик даражаси ҳам текширилади.

ЖССТ ушбу вирусга қарши илк навбатда, ҳомиладорлар, 6 ойликдан 5 ёшгача бўлган болалар, кексалар, сурункали касалликлари бор беморлар ва тиббиёт ходимларини эмлашни тавсия этади.