Фуқаро ёки тадбиркорлар уй-жой ва бошқа тадбиркорлик обектларини олди-сотдиси ҳамда бошқа сабаблар туфайли кадастр паспортини тайёрлаш, кадастр ҳужжатларини расмийлаштириш масаласига тўқнаш келди.

Ушбу хизматлар қандай амалга оширилади?

Кадастр паспортини олиш учун ариза беривчи Давлат хизматлари марказига ўзи келиб мурожаат этади ёки Ягона интерактив давлат хизматлари порталида давлат хизматидан электрон тарзда фойдаланиш учун рўйхатдан ўтади.

Ариза берувчилар ўзи келиб мурожаат этган тақдирда, Давлат хизматлари марказлари ходими — ариза берувчи номидан, Ягона интерактив Давлат хизматлари портали орқали мурожаат этган тақдирда сўровномани электрон шаклда мустақил тўлдиради. Учинчи шахслар манфаати учун ҳаракат қилаётганда, сўровномага белгиланган тартибда расмийлаштирилган ишончнома илова қилинади.

Зарур маълумотлар сўровномага киритилгандан сўнг ариза берувчи маълумотларнинг тўғрилигини текширади ва имзоларни идентификатсия қилишнинг тегишли воситалари (дактилоскопия, электрон имзо, Мобил-ID ва бошқалар) билан тасдиқлайди.

Кадастр паспорти объектнинг мураккаблигига қараб, қуйидаги муддатларда тайёрланади:

Кўчмас мулк обйектларининг турар жойга оид қисми бўйича:

кўп квартирали уйдаги квартира учун — 3 иш кунигача;

якка тартибдаги турар жой учун — 5 иш кунигача;

Кўчмас мулк обйектларининг нотурар жойга оид қисми ҳамда яхлит кўп квартирали уйлар бўйича:

умумий майдони 100 кв.м. гача бўлганда — 5 иш кунигача;

умумий майдони 100 кв.м дан 1 000 кв.м. гача бўлганда — 7 иш кунигача;

умумий майдони 1 000 кв.м дан 5 000 кв.м. гача бўлганда — 10 иш кунигача;

умумий майдони 5 000 кв.м дан 15 000 кв.м. гача бўлганда — 15 иш кунигача;

умумий майдони 15 000 кв.м дан 50 000 кв.м гача бўлганда — 20 иш кунигача;

умумий майдони 50 000 кв.м дан ортиқ бўлганда — 25 иш кунигача;

ажратилган ер участкалари бўйича — 3 иш кунигача;

Кўп йиллик дов-дарахтлар жойлашган ер участкаси бўйича:

умумий майдони 1 гектаргача — 10 иш кунигача;

умумий майдони 1 гектардан 5 гектаргача — 15 иш кунигача;

умумий майдони 5 гектардан 10 гектаргача — 20 иш кунигача;

умумий майдони 10 гектардан 100 гектаргача — 25 иш кунигача;

умумий майдони 100 гектардан ортиқ — 30 иш кунигача.

Кадастр йиғмажилди шакллантирилгандан сўнг кадастр паспорти бериш ва кўчмас мулк обйектига бўлган ҳуқуқни рўйхатдан ўтказиш учун тўлов миқдори қиймати кўрсатилган хабарнома (инвойс) Давлат хизматлари марказига (ўзи келиб мурожаат қилган тақдирда) ёки ариза берувчига (електрон шаклда мурожаат қилган тақдирда) Ягона интерактив Давлат хизматлари портали орқали орқали электрон шаклда юборади.

Давлат хизматлари марказлари хабарнома келиб тушгандан сўнг реал вақт режимида бу ҳақда ахборот-коммуникация тизими орқали ариза берувчини хабардор қилади.

Белгиланган муддатда тегишли тўлов миқдори тўланмаслиги кадастр паспортини беришни рад этиш учун асос бўлади. Ушбу ҳолатларда ариза берувчи умумий тартибда давлат хизматидан фойдаланиш учун такроран мурожаат қилишга ҳақли.

Давлат хизматидан фойдаланиш учун ЯИДХП орқали мурожаат этилганда, тўлов қиймати суммасининг 90 фоизи ундирилади.

Давлат кадастрлари палатаси Андижон

вилояти бошқармаси Жамоатчилик билан

алоқалар бўйича бош мутаҳасиси

Д.Исмаилова.