Евро ва доллар 2002 йилдан бери биринчи марта тенглашди. Европа марказий банки Европа валютасининг қулаши олдини олиш учун кредитлар бўйича фоиз ставкаларини оширишда давом этади.

20 йил ичида биринчи марта икки йирик жаҳон валютаси паритетга келди: 12 июль, сешанба куни еврони 1,00003 АҚШ доллари нархида сотиб олиш мумкин бўлди.

Ягона Европа валютаси йил давомида аста-секин арзонлашди ва июнь ойида унинг нархи кескин тушиб кетди. Мутахассислар буни Украинадаги уруш оқибатлари ва «Шимолий оқим 1» газ қувурининг режали техник хизмат кўрсатиш учун тўхтатилиши фонида Россия гази нархининг ошиши билан боғлашмоқда.