Аввал хабар берганимиздек, Президентимизнинг топшириғига асосан, Қорақалпоғистон Республикасининг Кегейли туманини ижтимоий-иқтисодий ривожлантириш Андижон вилояти фаолларига юкланган эди. Ҳозирда вилоятимизнинг қатор шаҳар ва туман ҳокимлари ҳудудда кенг кўламли фаолият олиб бормоқдалар. Бу ерда андижонлик тадбиркорлар томонидан 2022-2023 йиллар давомида умумий қиймати 604 миллиард сўм бўлган 23 та лойиҳани амалга ошириш режалаштирилган. Натижада ҳудудда яна 1700 та янги иш ўрни юзага келади.

Айни пайтда “Андижон Макро Фарм” МЧЖ томонидан туманда лойиҳа қиймати 6 млн АҚШ долларига тенг тиббиёт буюмларини ишлаб чиқариш корхонаси ташкил этилмоқда.

Лойиҳада тиббиёт учун керакли бўлган шприц ва системалар ишлаб чиқариш кўзда тутилган бўлиб, технологиялар Хитой Республикасидан олиб келинмоқда.

Жорий йилнинг 2 апрель куни вилоят ҳокими Шуҳратбек Абдураҳмонов бошчилигидаги делегация Кегейли туманида бўлди.

Шу куни андижонлик фаоллар ҳамда мезбонлар иштирокида “Андижон Макро Фарм” МЧЖ барпо этаётган тиббий буюмлар ишлаб чиқариш корхонасига тамал тоши қўйилди.

«Andijonnoma.uz» онлайн гуруҳи