“Йилнинг энг яхши ўрта тиббиёт ва фармацевтика ходими” кўрик-танлови соҳа фидойиларининг билим ва тажрибалари намоён бўладиган катта майдонга айланди.

Бу йилги танловнинг вилоят босқичида 161 нафар иштирокчи турли шартлар бўйича ўзаро беллашиб, билим ва маҳоратларини намоён қилдилар. Мамлакатимизда соғлиқни сақлаш тизимида ўтказилаётган ислоҳотлар, уларни амалга оширишда ҳамширанинг ўрни ва вазифалари, тиббий билимларга оид тезкор саволларга жавоблар орқали ҳар бир ишитирокчи холис баҳоланди. Шунингдек, одам анатомияси ва физиологияси, касаллик белгилари, ҳамширалик иши, тиббий ҳужжатлар, шошилинч тиббий ёрдам, дори воситалари, юқумли касалликлар профилактикаси ҳамда кундалик касбий иш салоҳиятини кўрсатувчи эркин мавзулар бўйича билимларини кўрсатиб бердилар.

Вилоят босқичида турли номинациялар бўйича 15 нафар тиббиёт ходими ғолиб деб топилди.“Йилнинг энг яхши тиббий бригада ҳамшираси” номинациясига Андижон шаҳридаги 6-оилавий поликлиника ҳамшираси Дилдорахон Аҳмедова муносиб деб топилди. Энди у танловнинг республика босқичида иштирок этади.

– Ҳар кунги фаолиятимизнинг ўзи кучли тиббий билим ва пухта тайёргарликни талаб этади, - дейди Дилдора Аҳмедова. – Поликлиникамиз бош шифокори Шоҳидахон Насриддинова ишни тизимли ва тартибли ташкил этган.

Аҳоли орасида касалликларни эрта аниқлаш, скрининг дастурларини самарали ўтказиш, аниқланган касалликлар бўйича манзилли соғломлаштириш ишларини ташкил этиш бўйича штаб фаолият кўрсатмоқда.Шифокор, потранажлар, доя ва амалиёт ҳамширасидан иборат тиббий бригадамиз 2 минг 136 нафар аҳолига хизмат кўрсатади. Паҳтакор маҳалласи, Сарбон, Чинобод, Мевазор, Деҳқон, Чаманзор кўчаларидаги хонадон соҳибларининг саломатлиги доимий назоратимизда. Ҳозирги кунда белгиланган ёш оралиғидаги аҳоли вакилларини қандли диабет, онкогемотологик касалликлар, аёллар ўртасидаги жиддий хасталиклар бўйича скринингдан ўтказяпмиз.

Соҳада қарийб йигирма йиллик тажрибага эга Дилдора Аҳмедова дастлаб Олтинкўл туманидаги Жалабек қишлоқ врачлик пунктида фаолият бошлади. 2018 йилдан буён 6-оилавий поликлиникада ишлаяпти. Дилдора юксак муомала маданияти, зарур вазиятларда керакли қарор қабул қила олиши, қўли енгил ҳамшира эканлиги билан жамоада кўпчиликка намуна бўла олади. Одамлар орасида “яхши ҳамшира” деб ном қозонгани ҳам ана шундан.

Тожибархон МАМАЖОНОВА,

Андижон шаҳридаги

6-оилавий поликлиника

бош ҳамшираси.