Пахтаобод тумани ғаллакорлари ҳам айни кунларда ҳосилни йиғиштириб олиш учун жадаллик билан ҳаракат қилмоқдалар. Ҳозирда туманда 28 та ўрим комбайнидан фойдаланган ҳолда отряд усулида иш ташкил қилинган. 6 870 гектар майдонга экилган буғдойдан 20 минг 442 тонна ғалла сотиш ниятида деҳқонлар астойдил ҳаракат қилмоқдалар.

- Ғалламайдонларининг катта қисмида ўрим ишлари энди бошланишини ҳисобга оладиган бўлсак, бу йилги хирмонимиз анча юқори бўлишидан дарак бор, - дейди туман Озод массивидаги «Карим сайёд» фермер хўжалиги раҳбари Акмалжон Қўлдошев. – Жами 40 гектар ерга буғдой экканмиз. Ҳар бир гектардан ўртача 75-80 центнер ғалла оляпмиз.

- Йил яхши келди, агротехник тадбирларниўз вақтида ўтказдик, режани ҳам ортиғи билан бажариш ниятидамиз, - дейди комбайнчи Миржалол ака Убайдуллаев. –Буғдой пишгандан кейин қисқа вақт давомида йиғиштириб олинмаса, унинг бошоқларидаги дон ўз-ўзидан тўкила бошлайди. Шамол, ёввойи қушлар ва кемирувчилар зарари натижасида ҳосил нобудгарчилиги белгиланган миқдордан ошиб кетади. Шу боис ҳам уни нест-нобуд қилмасдан қисқа муддатда йиғиштириб олиш ҳаракатидамиз.

Хирмонингизга барака, пахтаободликлар!