Ҳамширалик – масъулиятли ва шарафли касб. Буни қадрига етиб, улуғлаганлар кам бўлмайди.Фотимахон Абидова ана шундай ўз касбига меҳр қўйиб ҳурмат қозонганлардан.

Онаси Оля опанинг (у 35 йил шу касбда ишлаган) изидан борган Фотима ва Зуҳра ҳали ўқувчилик пайтидаёқ ҳамширалик сирларидан бохабар бўлганлар. Қизиқиш ва интилишлар натижасида опа-сингил тиббиёт коллежини муваффақиятли тамомладилар. Фотима Пахтаобод тумани тиббиёт бирлашмаси жарроҳлик бўлимига, Зуҳра поликлиникага ишга жойлашди.

Фотима ёш бўлишига қарамай,шифокор кўрсатмаларини аниқ ва тўкис бажариши, заҳнлилиги, беморлар тилида “қўли енгиллиги” билан жамоада ҳурмат қозонди. Мураккаб орепациялардагииштироки унинг билим ва кўникмаларини мустаҳкамлади.

- Фотима муомала маданияти, орасталиги бўйича бўлимнинг кўзгуси ҳисобланади, - дейди бўлим мудири, олий тоифали шифокор, тажрибали жарроҳ Муроджон Юсупов. – Шу соҳада 13 йилдан буён ишлаётган бўлса, у ҳақида фақат яхши фикрлар билдирилади.

Беморларга ўз вақтида дори-уколларни беришда бенуқсон ҳаракатлари билан кўзга ташланди. Шунданми, аксарият беморлар “Менга Фотимахон укол қилсин, томирга тез тушади, оғритмайди”, дейишади.

Шундай ҳолатлар бўладики, ярим тунда оғир касаллар келганида Фотимани уйидан чақиртиришиб ҳам олишади. Қайнота ва қайнонаси шифокор бўлгани боис, бундай вазиятларни тўғри тушунишади.

2 нафар фарзанднинг онаси Фотима Абидовада яна бир иқтидор бор. У жамоат ишларида ҳам ташаббускорлардан. Туман тиббиёт бирлашмасидаги барча тадбирларни бошловчи сифатида олиб боради. “Ассалом тонг” дастурининг туман ва вилоят босқичи совриндори.

Шунингдек, у сузиш ва гимнастика билан шуғулланади. Жамоасидаги аёл-қизларни ҳам спорт билан шуғулланишга ундайди. Фотима яқинда бўлиб ўтган йирик танловнинг вилоят босқичида“Йилнинг энг яхши муолажа эмлаш ҳамшираси” номинацияси бўйича ғолибликни қўлга киритиб, республикага йўлланма олди.

Ғуломқодир АБДУРАҲИМОВ.