Бекорчидан худо безор, деб бежиз айтилмаган. Ёши 25 га тўлган бўлса-да, бирор-бир фойдали меҳнат билан шуғулланишни хаёлига келтирмаган Авазбек Йўлдошбоев (исми-шарифлари ўзгартирилди) ҳам Қўрғонтепа туманидаги “Бибисешанба” зиёратгоҳи атрофида тентираб юриб, йўлдан сим карта топиб олди-ю, унинг эгаси – Гулбаҳор Ғафуржоновани безор қила бошлади.

Гап шундаки, мактабда 10-синфда ўқийдиган Гулбаҳор шу йил февраль ойида уяли телефонининг сим картасини кўчада йўқотиб қўяди. Сим карта, юқорида айтилганидек, Авазбекнинг қўлига тушади. Йигит уни смартфонига солиб кўрса, ишлаяпти. Ҳатто қиз бола номидан телеграм ҳам очилган экан.

Телеграмда Гулбаҳорнинг шахсий суратлари, жумладан, синфдош йигитлар билан тушган расмлари ҳам бор эди. Авазбекнинг кўнглига шайтон оралади. “Эгасини топиб, расмларини тарқатмасликни пеш қилиб, пулини олсамми?” деб хаёлан режа тузаётган чоғда, худди шуни сезгандек телеграмдан сим картанинг эгаси ўзини таништириб, “Илтимос, сим картамни қайтариб беринг, йўқотиб қўйгандим”, дея хабар ёзиб қолди.

Авазбек эса уни 500 минг сўм эвазига қайтариб бериши мумкинлигини, йўқса, шахсий суратларини тарқатиб юбориш билан очиқчасига таҳдид қилиб, товламачилик йўлига ўтди.

Аслида, сим картада ахлоқсиз суратлар йўқ эди. Ўқувчи қиз ҳам таҳдиддан таҳликага тушиб қолмади, аксинча, ҳолат юзасидан дарҳол ички ишлар идорасига ариза ёзди. Учрашувга келишилган куни сим карта эвазига Гулбаҳордан талаб қилинган пулнинг 200 минг сўмини қуртдай олаётган Авазбек эса шу заҳотиёқ ашёвий далиллар билан ушланди.

Ёмонлик ҳеч қачон жазосиз қолмайди. Суд ҳолатга баҳо бериб, вояга етмаган жабрланувчи ҳамда унинг қонуний вакилининг судланувчига нисбатан ҳеч қандай даъвоси йўқлиги инобатга олган ҳолда, А.Йўлдошбоевга Жиноят кодекси 165-моддаси 1-қисми билан 3 (уч) йил муддатга озодликни чеклаш жазоси тайинлади. Шунингдек, ҳукм билан судланувчининг зиммасига оммавий ва бошқа тадбирлар ўтказишда иштирок этмаслик, маҳкумларни назорат қилувчи органнинг розилигисиз яшаш жойини ўзгартирмаслик, шунингдек, Андижон вилояти ҳудудидан ташқарига чиқмаслик, спиртли ичимликлар сотиладиган жойлар ва савдо нуқталарига бормаслик, алкоголли ва спиртли ичимликлар истеъмол қилмаслик каби қўшимча тақиқлар юкланди.

Сим карта можароси билан боғлиқ воқелик нафақат Авазбек, балки бошқаларга ҳам сабоқ бўлса, ажабмас.

Озодбек НЕЪМАТИЛЛАЕВ,

жиноят ишлари бўйича Қўрғонтепа тумани суди судьяси.