Суперлига вакили “Андижон”нинг бош мураббийи А. Хомяков бу йилги мавсумга жамоани яхши шакллантира олмади. Гарчанд вилоят ҳокимлиги томонидан барча зарур шарт-шароитлар яратилган бўлса-да, кўзланган натижага эришилмади. Ўтган йили “Бургут”лар сафида муносиб тўп сурган бир неча ўйинчилар негадир жамоани тарк этди. Таркибга қабул қилинган беш нафар чет эллик (легионер) футболчилар талаб даражасида тўп суриша олмаяпти.

Ваҳоланки, улар маҳаллий ўйинчилардан бир поғона устун бўлиш керак эди. Яна бир неча футболчиларда ҳам сусткашлик сезиляпти. Чемпинатни бир амаллаб яхши бошлаган Андижон футболчиларида ўйиндан ўйинга толиқиш юз бера бошлади. Бу футболчиларни тажрибасизлиги ва ёши ўтганлиги билан боғлиқ. Бунинг устига бош мураббий жамоа рўйхатидаги мавжуд футболчиларни тактик жиҳатдан ҳаракатланишларида хатога йўл қўйди. Энг ачинарлиси кубок ва чемпионат ўйинларида кетма-кет олти марта мағлубиятга учраганлиги, ҳатто 1-лига вакили Қашқадарёнинг “Лочин” клубига имкониятни бой берганлиги аламли бўлди. Андижон ўзининг 61 йиллик тарихида ҳеч қачон сурункали олти марта мағлубиятга учрамаган. Бу натижалар жамоани қуйи поғоналарга улоқтириб ташлади.

Бу йил “Андижон” ннг Осиё чемпионлар лигаси-2 да қатнашишини (мусобақалар йилнинг иккинчи ярмидан бошланади) ҳисобга олинса, бу таркиб билан кўзланган мақсадга эришолмаслик, бу аҳволда суперлига билан ҳам хайрлашиш хавфи туғилаётганлиги сезилиб қолди. Шуни ҳисобга олиб клуб раҳбарияти А. Хомяковни бош мураббийлик вазифасидан озод этди.

Клубга бош мураббий этиб, ўз даврининг етук футболчиси бўлган машҳур Киевнинг “Динамо” клуб жамоасида тўп сурган, Ўзбекистон терма жамоаси таркибида муносиб иштирок этган, кейинчалик мураббийлик фаолиятида ҳам ўзини кўрсата олган “Пахтакор” жамоасини икки карра республика чемпионлигага олиб чиққан, ҳозирги пайтда “Пахтакор” клуби раисининг маслаҳатчиси бўлиб ишлаб келаётган Максим Шацских тайинланганди.

Вилоят ҳокими Ш. Абдураҳмонов, жамоа бош хомийси “Ўзавтосаноат” уюшмаси раиси У. Рўзиқуловлар Шацских билан юзма-юз гаплашиб уни қўллаб-қувватлашини, етарли шароитлар яратиб берилишини билдириб, унга жамоа таркибини кучайтириш вазифасини топширди.

Бунга жавобан Максим Александрович қуйидаги фикрларини баён этди: “Энг аввало, ишонч учун катта раҳмат. Менга таклиф тушганда Андижондаги инфратузилмадан раҳбарлар ва мухлисларнинг эътиборидан келиб чиқиб розилик билдирдим. Максимал натижа билан андижонликларни мамнун этишга ҳаракат қиламан. Бунинг учун вақт керак. Футболчиларни нималарга қодир эканлигини ўрганиб бораман. Шунга қараб чизиқлар бўйича етук футболчиларни ёзги трансферда олиб қоламан ва тажрибали футболчилар билан таркибни тўлдириб, кучайтираман. “Андижон”ни илк бор чемпионатда совриндор бўлишини таъминлаш йўлида бор билим ва кучимни сарфлайман.”

М. Шацских 14 майдан жамоани расман қабул қилиб олди. Бугун - 17 май куни эса у илк бор фтуолчиларни “Шўртан”га қарши сафар ўйинига олиб тушади.

Ғуломқодир АБДУРАҲИМОВ,

футбол шарҳловичиси.