Кимё бўйича 2022 йилги Нобел мукофоти америкалик Каролин Бертоцци ва Барри Шарплесс, шунингдек, даниялик Мортен Мелдалга молекулаларни яратиш воситалари устида ишлагани учун берилди. Мукофот уларга «Клик кимёси ва биоортогонал кимё усулларини ишлаб чиққанлиги учун» топширилган. Бу, Шарплесс учун иккинчи Нобел мукофотидир.

Эслатиб ўтамиз: 1901 йилдан бери кимё бўйича Нобел мукофоти 114 марта, 190 кишига берилган.

Бир кун олдин физика бўйича Нобел мукофоти совриндорларининг номлари эълон қилинди. Улар америкалик Жон Клаузер, француз Ален Аспект ва австриялик Антон Цайлингер бўлди. Мукофот «чалкаш фотонлар билан тажрибалар, Белл тенгсизликлари бузилиши аниқлангани ва квант информатикасидаги новаторлик учун» берилди.

«Нобел ҳафталиги»нинг илк кунида тиббиёт бўйича мукофотлар топширилди. Мукофот швед биологи Сваанте Пабога йўқ бўлиб кетган гоминин геномлари ва инсон эволюцияси соҳасидаги кашфиётлари учун берилди.

Бугун, 6 октябр куни адабиёт бўйича Нобел мукофоти совриндори, 7 октябрь куни Тинчлик мукофоти совриндори, 10 октябрь куни эса Швеция Давлат банкининг иқтисод фанлари бўйича Алфред Нобел хотира мукофоти совриндорлари номи эълон қилинади.