Олтинкўл туманида ташкил этилган жами 58 та референдум участкасида 108 минг 315 нафар овоз берувчи рўйхатга олинган. Уларнинг 1 минг 625 нафари муддатидан олдин овоз бердилар. Илк марта бундай сиёсий жараёнда иштирок этаётган 3 минг 817 нафар йигит-қизнинг ҳаяжони сезилгани рост.

• Очиғи, оиламдагиларнинг овоз беришга ёки сайлашга чиқиб кетаётганларида жуда қизиқардим, - дейди тумандаги 626-референдум участкасида овоз берган 42-умумтаълим мактаби битирувчиси Маржонахон Асронбоева. – Мана ўзим ҳам бугун ўша қизиқишларимни амалда кўрсата олдим. Биринчи марта овоз бераётганим учунми ҳаяжоним босилмади.
• 

Мазкур участкада илк марта овоз бераётган ёшлар учун участка комиссияси раисининг махсус рағбатлантирувчи совғалари ташкил этилганлиги қувончли.

Туманнинг Қорақалпоқ маҳалла фуқаролар йиғини ҳудудидаги 38-умумтаълим мактабида жойлашган 624-референдум участкасида рўйхатга олинган 2021 нафар овоз берувчиларнинг 84 нафари муддатидан аввал овоз берганлардир. Ҳамон овоз берувчилар қадами узилмаётгани жараён қизғин давом этаётганидан дарак.

-Участкада амалдаги Конституция ва асосий қонуннинг янги таҳрири лойиҳаси, шунингдек, таклиф этилаётган ўзгаришлар бўйича 100 саволга жавоб тўпламлари тайёрлаб қўйилгани айни муддао бўлди, - дейди кузатувчи Хуснора Абдуллаева. -Конституциянинг таклиф этилаётган янги таҳриридаги алоҳида бандлар билан бирга ҳужжат лойиҳасининг тўлиқ матни ҳам стендларда кўрсатилгани овоз берувчиларнинг сиёсий воқелик ҳақидаги саволларига жавоб учун хизмат қилди.

2-Андижон референдум округи Матбуот маркази.