Яқинда Францияда бўлиб ўтган ёзги олимпиада ўйинларида ўзбекистонлик Фан клуби аъзоларининг стадионда мухлислик, Париж кўчаларида миллий қўшиқларимизни айтиб юргани интернет тармоқларида, оммавий ахборот воситаларида анча шов-шув бўлди.

Катта дўппи кийиб олган йигит ўзимизнинг Андижонлик Нодирбек Тўйчиев бўлади.

1986 йилда футболга кириб келганман, - дейди у суҳбатимиз аввалида.- Андижон ёшлар жамоасида 5-рақамда тўп сурардим. Кейинчалик миллионлар ўйинига ишқибозлигим ҳаётим мазмунига айланди.

Ўзбекистонлик мухлислар сафида Қатар, Хитой, Индонезия, Сингапур, Таиланд каби қатор мамлакатларда халқаро мусобақаларни жонли кўриш насиб этди. Дунёнинг қай юртига бормай, бошимда мана шу катта дўппи бўлган.

Қачондан буён катта дўппи киясиз?

Диоганали 50х50 сантиметр ўлчамдаги дўппини дастлаб 2009 йил Мисрдаги мусобақаларга бориш олдидан онамнинг катта опалари – Карима холам тикиб берган. Ўшандан буён ишқибозлар сафида шу бош кийимда бўламан.

Париж-2024 ўйинларига Ўзбекистон Фан клуби аъзоларининг 200 нафари вилоятимиздан эканлигини айтиб ўтмоқчиман. Йирик мусобақаларда стадионнинг ўзида атлетларимизни жонли қўллаб-қувватлашнинг завқи бошқача бўлади.

Фан клубимиз катта жамоа. Унинг сафида турли касб эгалари бор. Темурийлар келди, Бобурийлар келди, деган хитоб билан она Ватанни, унинг мард ва азамат ўғил-қизларини, тинч ва фаровон юртимизни мадҳ этувчи шеър ва қўшиқлар ўша ернинг ўзида яралиб, куйланди. Бу она тупроққа муҳаббат, юртга садоқат, Янги Ўзбекистон ютуқларидан ғурурланиш, ифтихорнинг ёрқин рамзидир.

Энг қизиғи, Париж кўчаларида миллий қўшиқларни баралла айтиб юрар эканмиз, бутун дунёдан келган одамлар “Узбекистан, Узбекистан” дея биз билан суратга тушишга ошиқишди. Ҳатто, дўппини 5000 еврога сотишимизни сўрашди. Бу ўзбекнинг ғурури, шаъни. Пулга сотилмайди, деганимизни эшитиб, яна бир бор бизга тан беришди.

Нодирбек Тўйчиевнинг бир ўғли, икки қизи бор. Ўғли Муҳаммаджон ҳам футбол ишқибози.

- Президентимизга, вилоятимиз ҳокимига катта раҳмат, - дейди Нодирбек.- Фанклубнинг олимпиадага бориб-келиш, кунлик ҳаражатларини тўлиқ қоплаб беришди. 2022 йилда вилоятимиз ҳокими спортнинг ашаддий мухлиси дея “Trackеr” автомобили совға қилди.

Бир неча кундан сўнг паралимпия ўйинлари бошланади. Вилоятимиздан 30 нафар мухлис яна Франция сари отланамиз. Матонатли спортчиларимизни бутун халқимиз номидан онлайн олқишлаб турамиз. Бу гал ҳам дунё аренасида мамлакатимиз байроғи бир неча бор юқори кўтарилиб, давлатимиз мадҳиясини кўп бор биргаликда куйлаймиз.

Гулжаҳон ЖАББОРОВА суҳбатлашди.