Давлатимиз раҳбари Шавкат Мирзиёевнинг тарихий Мурожаатномасини тинглаб, очиғи, енгил нафас олдим. Нега деганда, кейинги пайтларда ҳаммамизни ўйлантираётган ҳаво тозалиги, сув тақчиллиги ва экология муаммоларига Президентимиз томонидан бу қадар жиддий, қатъий ва аниқ ечимлар таклиф қилингани кўнглимизни тоғдек кўтарди.

Мурожаатномада табиатни асраш шунчаки шиор эмас, балки давлат сиёсатининг “бешинчи устувор йўналиши” сифатида белгилаб берилди.

Биринчидан, биз энди “тоза ҳаво” учун курашамиз. Шунингдек, экологияга зарар берадиган эски машиналар учун “экологик стикер” тизими жорий қилиниши ва шаҳар марказларига киришнинг чекланиши – биз кутган ва қўллаб-қувватлайдиган қарордир.

Иккинчидан, сув – бу ҳаёт, уни асраш бурчимиз. Президентимиз: “Сувдан оқилона фойдаланишни давлат сиёсати даражасига олиб чиқдик”, деб жуда тўғри айтдилар. Келгуси йилда сувни тежашга нақд 3 триллион 300 миллиард сўм ажратилиши, 1300 километр каналларнинг бетонланиши ҳисобига йилига 500 миллион куб метр сув тежалиши – бу қишлоқ хўжалигимиз учун обиҳаёт демакдир. Деҳқонларимиз сувсиз қолмайди, ризқимиз бутун бўлади.

Учинчидан, шаҳарларимиз “яшил” ва салқин бўлади. Қолаверса, Оролнинг қуриган тубида яна 115 минг гектар ўрмонзор барпо этилиши, Сурхондарё ва Сирдарёда “яшил белбоғ”лар яратилиши чанг-тўзонларга қарши энг қудратли қалқон бўлади.

Тўртинчидан, келажак транспорти – электр. Электромобиль оламан деган юртдошларимизга кредит фоизларининг арзонлаштирилиши, қувватлаш станциялари учун тадбиркорларга берилаётган имтиёзлар юртимизни замонавий ва экологик тоза мамлакатга айлантиради.

Президентимизнинг “Глобал исиш ва экологик муаммолар чегара билмайди”, деган фикрларидан хулоса қилган ҳолда, мен, шу юртнинг ватанпарвар фарзанди сифатида сўз бераман: ўз хонадонимда сувни тежайман, маҳалламни кўкаламзорлаштиришда фаол қатнашаман ва фарзандларимга табиатни севишни ўргатаман.

Чунки 2026 йилда экология соҳасига йўналтирилаётган 1 триллион 900 миллиард сўм маблағ – бу бизнинг ва болаларимизнинг соғлом келажаги учун тикилган сармоядир. Бу имкониятни асраш барчамизнинг қўлимизда!

Ҳокимжон МАҚСУМОВ

вилоят Экология, атроф-муҳитни муҳофаза қилиш ва иқлим ўзгариши бошқармаси бошлиғи вазифасини бажарувчи.