Маълумки, юртимизнинг барча ҳудудларида бўлгани каби вилоятимизда ҳам аномал совуқ ҳаво ҳарорати кузатилмоқда. Мана шундай вазиятда аҳолига бир маромда табиий газ етказиб беришда газ тақсимлаш қурилмаларининг созлиги ва қувурларни газ ўтказувчанлиги асосий ўрин тутади.

Марҳамат туманида бугунги кунда 458 км газ қувурлари орқали истеъмолчиларга табиий газ етказиб берилмоқда. Мазкур қувурларнинг 112 км ер остида, 346 км қисми эса ер устида жойлашган. Бугунга қадар чилангарлар томонидан 402 км қувурлар қайта назоратдан ўтказилди. Шунингдек, мавжуд 76 та газ тақсимлаш қурилмаларида ҳам созлаш, режали кўрик ишлари амалга оширилмоқда.

“Куни кеча, “Ўзбекистон” МФЙ ўрамидаги “Оқибатли” кўчасида жойлашган кўп қаватли уйларни газ билан таъминловчи диаметри Д-76 мм бўлган ер усти газ қувурининг 2 кмлик қисмини ҳамда 3 дона газ тақсимлаш қурилмаларини назоратдан ўтказдик, - дейди “Марҳаматтумангаз” газ таъминоти бўлими чилангари Дилшодбек Нурматов. Шунингдек, “Марҳамат” автоматик газ тақсимлаш шохобчасидан чиқишдаги аҳоли ва улгуржи истеъмолчилар учун чиқарилган коллекторда меъёрлаштириш ва созлаш ишлари бажарилди. “Марҳамат-Пахтакор” йўналишидаги ҳаракатдаги ер устида жойлашган ўрта босимли диаметри Д-159 мм бўлган газ тармоғи махсус ускуна ёрдамида текширилди ва газ сизиб чиқиши аниқланмади...”

Қишнинг қаҳратон кунларида ишлашни ўзи бўлмайди. Мана шундай кунларда ҳам аҳолига газ етказиб беришда чилангарларнинг хизмати беқиёс. Кунлик газ тармоқларининг назорати ҳамда газ тақсимлаш қурилмаларидаги режим-созлаш ишларини олиб бориш ҳаво ҳароратининг даражасидан қатъий назар олиб борилмоқда. Соҳа ходимлари эса мана шундай совуқ кунларда ҳам ўз вазифаларини масъулият билан амалга оширмоқдалар.

“Ҳудудгаз Андижон” газ таъминоти филиали матбуот хизмати