Ёхуд тротуарларни “эгаллаётган” машиналарни ким назорат қилади?

Кечки пайт. Манзилли дамас автомашинасида ишдан қайтаётгандим. Йўллар тирбанд. Одатда эрталаб ва кеч маҳали шунақа ҳолат кузатилади. Ҳамма ишга кетаётган ва қайтаётган вақт.

Дамас ҳайдовчисининг тирбандликдан зериккани асабий гап-сўзларидан кўриниб турибди. Лекин наилож. Бироқ сабри етмади. Йўловчилар учун мўлжалланган тор йўлак томон машинани ҳайдади. Тротуар яқин ўртадаги мактабдан чиқаётган ўқувчилар билан гавжум. Сигнал билан йўлини “очиб” бораётган ҳайдовчининг бу қилиғидан ростмона жаҳлим чиқди. Шу вақт ёши каттароқ бир киши автоуловнинг қаршисига чиқиб, ортга қайтишини айтди:

• Кўрмаяпсанми, бу пиёдалар учун йўлак, сени йўлинг ана у! – деди қўли билан катта йўлни кўрсатиб.

Бироқ ҳайдовчимиз осмонда экан. Хоҳлаган йўлидан юришини айтиб бўш келмади. Шунда чидаб туролмадим. Мен ҳам катта йўлга чиқиб олиши кераклигини талаб қилдим. Ажабки, унинг тошлари энди менга отила бошлади. Аралашмаслигимни пўписа қиларкан, бўш келиш ишим эмаслигини қонуний эслатиб қўя қолдим. Жавобгарликни эшитгач, хартугул пасайди. Қолаверса, бояги киши ҳам йўл бермай туриб олди. Мажбур ортига қайтиб, катта йўлга чиқиб олган дамас ичида аллақандай асабий кайфият ҳукмрон бўлди то барча манзилига етиб боргунча.

Менинг ҳам ўша мактаб ўқувчилари кабифарзандларим бор. Уларга ҳам ҳар куни эрталаб пиёдалар йўлагидан юришларини тайинлайман. Катта йўлда ҳаракатланадиган машиналар қатнови бугун жуда кўпайган. Тезлик ҳам сезиларли ортган. Турли ҳайдовчилар бор. Кимдир меъёрида, эҳтиёткорлик билан, яна кимдир “ўпкасини босолмай” машина ҳайдайди. Пиёдалар йўлаги эса инсонларни йўл балоларидан асраш учун аслида!

Автоуловлар эса бундай йўлакларда ҳаракатланишга қонуний ҳам, виждонан ҳам, инсонан ҳам ҳақли эмаслар!

Йўл тирбандми? Озгина сабр қилинг! Сабрингиз мана шундай тирбандликларга, навбат кутишларга етмаса, яхшиси, машина ҳайдамай қўяқолинг!

Дамас ҳайдовчиси каби шошқалоқлик, сабрсизлик билан тирбандликдан қочиб, пиёдалар йўлагида ҳаракатланиш инсонлар умри, хавфсизлиги билан ўйнашишдан бошқа нарса эмас!

Кўз олдингизга ўз фарзандингиз, оилангиз келсин!

Зилола РАҲМОНОВА