Андижон шаҳридаги Ўзбекистон Савдо-саноат палатаси ҳудудий бошқармасида O’zLiDeP Андижон вилоят Кенгашининг кенгайтирилган йиғилиши бўлиб ўтди. Ўзбекистон Республикаси Президентининг 2023 йил 11 сентябрдаги ““Ўзбекистон-2030” Стратегияси тўғрисида”ги Фармонида белгиланган долзарб вазифалар ижросига масъулият билан ёндашиш ҳамда Стратегиянинг мазмун-моҳиятини аҳолининг кенг қатламига етказиш, шунингдек, партиянинг мақсад ва вазифалари ижроси масалаларига бағишланган мазкур йиғилишда халқ депутатлари вилоят, туман ва шаҳар Кенгашидаги партия депутатлик гуруҳи аъзолари, партия ходимлари, фахрийлар, Ёшлар Парламенти аъзолари, фаоллар ва ОАВ вакиллари иштирок этдилар.

Дастлаб сўз олган партия вилоят Кенгаши раиси, халқ депутатлари вилоят кенгаши депутати Хуршидахон Халилова Стратегияни амалга ошириш ва унинг мақсадли кўрсаткичларига эришиш барча давлат органлари ва ташкилотлари фаолиятида энг устувор вазифага айланганини, унинг доирасидаги ислоҳотлар бўйича тадбирлар аҳоли томонидан билдирилган ташаббус ва фикрлар асосида сифатли олиб борилиши лозимлигини, белгиланган бешта асосий ғояларни амалда татбиқ этишда бир куч бўлиш давр талаби эканини алоҳида таъкидлади.

-“Ўзбекистон-2030” стратегияси доирасида ўз долзарблигини йўқотмаган барча мақсадларга эришиш таъминланади, - дейди Андижон Давлат педагогика институти декани, фалсафа фанлари доктори, профессор Азизбек Эгамбердиев. – Шу билан бирга Янги Ўзбекистонни ривожлантириш стратегиясида белгиланган чора-тадбирлар тизимли амалга оширилади. Стратегияда 5 та йўналиш бўйича 100 та мақсад назарда тутилган. Стратегиянинг амалга оширилиши билан ҳар бир инсонга ўз салоҳиятини рўёбга чиқариш учун муносиб шарт-шароитлар яратилади, барқарор иқтисодий ўсиш орқали аҳоли фаровонлиги таъминланади. Бу каби ғоялар замирида фақат ва фақат инсон қадри, манфаати мужассам.

Шунингдек, давомда партиянинг 2023 йил якунигача ва 2024 йилнинг биринчи ярим йиллигига мўлжалланган жамоатчилик назоратини амалга ошириш борасидаги вазифалар атрофлича муҳокама қилинди. Берилган топшириқлар ижросини бажаришда расмиятчиликдан қочиб, аниқ, тизимли иш ташкил қилишга, фаолиятни янги босқичга кўтаришга, кенг кўламдаги ислоҳотларнинг ташаббускорига айланишга ва масъулият билан ишлашга чақирилди.

Зилола РАҲМОНОВА